Shukri Xhelili ka 15 ditë kohë për të ankimuar në Gjykatën Kushtetuese vendimin e qeverisë që e shkarkoi atë nga detyra e kryetarit të Bashkisë së Peshkopisë pas video-skandalit.
“Organi i shpërndarë ose i shkarkuar mund të ankohet në Gjykatën Kushtetuese brenda 15 ditëve, dhe në këtë rast vendimi i Këshillit të Ministrave pezullohet”, thuhet në nenin 115 të kushtetutës.
Në kushtet kur kryebashkiaku i shkarkuar nuk e ankimon vendimin, atëherë Presidenti i Republikës cakton datën për mbajtën e zgjedhjeve të reja në këtë bashki nga ku del kryetari i ri.
Sipas nenit 10 të Kodit Zgjedhor, zgjedhjet mbahen jo më parë se 30 ditë dhe jo më vonë se 45 ditë nga data e njoftimit të ndërprerjes së mandatit.
Në rast ankimi të organit të shpërndarë ose të shkarkuar, zgjedhjet zhvillohen jo më parë se 30 ditë dhe jo më vonë se 45 ditë nga mbarimi i afatit që ka organi i shpërndarë për të ankimuar vendimin e Këshillit të Ministrave në Gjykatën Kushtetuese. Në çdo rast, Presidenti i Republikës nxjerr dekretin jo më vonë se 48 orë nga njoftimi për ndërprerjen e mandatit.
Qeveria mori vendimin për të shkarkuar nga detyra Shukri Xhelilin pasi ky i fundit u denoncua përmes një video se ofronte punë në Bashkinë e Peshkopisë në këmbim të favoreve seksuale.
