Artan Lame ishte i pranishëm në prezantimin e drejtores së re të Kadastrës, i cili dy ditë më parë dha dorëheqjen nga ky post.
Lame u shpreh falenderues ndaj Kryeministrit Edi Rama për faktin që gjatë gjithë punës së përbashkët, nuk i kishte ndërhyrë në vendimarrjet e tij.
Ai u shpreh po ashtu se reforma e pronës që është nga më të rëndësishmet në vend, nuk do të ishte ndërmarrë dot pa kreun qeverisë Edi Rama.
“Para disa kohësh thashë që Kadastra nuk përbën më lajm sepse ka hyrë në rutinën e punës së saj të përditshme dhe nga ana tjetër më dha trishtim sepse duke qenë i mësuar me ritmin e shpejtë të punës nuk po e gjeja më veten në këtë lloj gjëje. Për atë që është bërë në këto vite do të them vetëm dy shifra, 250 mijë legalizime dhe 1 milionë e 300 mijë shërbime të dhëna çdo vit.
Të gjitha këto kanë në themel reformën e pronës, që siç e tha dhe Kryeministri që është nga gjërat më të rëndësishme në këtë vend. Përtej kontributit të veçantë të shumë personave në këtë institucion, përfshirë dhe mua, kjo reformë nuk do të ishte ndërmarrë pa Edi Ramën. Akush tjetër nuk do t’i kishte hyrë këtij qederi përveç se një njeri si ai. Në gjithë këto vite të punës së përbashkët unë nuk e kam vuajtur prezencën e tij në vendimarrjet e mia. Kur janë bërë aktet, ligjet për sektorin, edhe kemi debatuar, por gjëja ka mbaruar aty. Kur gjëja është vendosur kam qenë totalisht i lirë në vendimarrjet e mia. Për këtë e falenderoj sepse nuk është e lehtë të bësh gjërat ashtu siç i mendon dhe nga ana tjetër ky ka qenë një sektor që jetë e mot frynte o nga paraja o nga politika. Por, kjo mosinterferencë e Kryeministrit në vendimarrje ka pasur një të keqe të vogël, sot mund ta kritikoj sepse nuk më heq dot nga detyra.
Besimi i tij total tek unë për gjënë ka bërë që një pjesë e stafeve të mos ndjejnë që ka një sy nga lart që i shikon dhe e kanë ndjerë veten si të pavarur dhe sikur s’janë pjesë e një të tëre që është qeverisja. Në këtë pjesë, drejtori tjetër duhet ta ndjejë këtë sy të Kryeministrit mbi vete dhe mbi të gjithë stafin. Kjo do ta ndihmonte që kur të shtypësh tastat duhet ta dredhësh gishtin mirë sepse ta dijë se çfarë e gjen nga mbrapa”, u shpreh Lame.
