Presidenti Ilir Meta ka vijuar edhe ditën e sotme takimet me partitë politike për të vendosur një datë të re për zhvillimin e zgjedhjeve lokale.
Ditën e sotme Meta është takuar me kreun e PDIU-së Shpëtim Idrizi, i cili pas dalje nga ky takim u shpreh se vendi po shkon drejt autoritarizmit, ndërsa shtoi se nuk është koha për të folur për një datë të re zgjedhjesh.
Idrizi tha se kryeministri Edi Rama duhet t’i thërrasë arsyes, ndërsa theksoi se është koha që të krijohet një pakt i madh për të gjitha forcat politike.
“Ky takim me Metën vjen në një situatë shumë të vështirë për demokracinë. Ndamë shqetësimet për situatën e rëndë ku ndodhemi, vlerësojmë aktin për çdekretimin e 30 qershorit, por i bëmë të qartë se sot nuk është dita dhe momenti për të diskutuar për datë të re por të ikim nga spiralja ku jemi fut, që po e nxjerr vendin jashtë shinave, momenti kur kokat e nxehta, që e kanë në dorë, të ulen në diskutime. Ajo që na intereson ne është që Shqipëria të bëjë zgjedhje të ndershme dhe jo të kontaminuar për shkak të shitblerjes së votave. Është momenti që është koha e përgjegjësisë politike për të bërë një pakt të madh për të gjitha forcat politike, i bej thirrje arsyes së Edi Ramës. Imagjinoni ca do ndodhte nëse opozita do vendoste që zgjedhjet të bëhen në 10 korrik, është koha ti kthehemi arsyes”, tha Idrizi./ Opinion.al E.Xh.
