Kryeministri Edi Rama është takuar mëngjesin e sotëm me kreun e PDIU, Shpëtim Idrizi. Në takim ka qenë i pranishëm edhe Aqif Rakipi. Reforma në drejtësi ka qenë tema kryesore e bisedës, ndërkohë që pritet votimi i saj në seancën e së enjtes, më 21 korrik.
Rreth orës 09:35 kryeministri Rama ka dalë nga ambientet e “Rognerit” aty ku po konsumonte kafen e mëngjesit me aleatin e tij Idrizin dhe iu drejtua në këmbë Kryeministrisë, pa dashur të bëjë komente për median.
Duke folur për “News 24” në përfundim të takimit, Idrizi tha se shpreson të arrihet kompromisi për reformën.
“Në fokus të takimit me Ramën reforma në drejtësi. Mbetem besimplotë se do të gjendet kompromisi për reformën. Tre ekspertët do ta gjejnë kompromisin e nevojshëm”, tha Idrizi.
Më pas në një deklaratë për mediat, Idrizi tha se nëse nuk arrihet kompromisi, atëherë propozimi i PDIU është që populli të vendosë me referendum.
“Shumë mirë që liderët shqiptarë të takohen dhe të gjejnë një kompromis. Kjo tryezë liderësh ka prodhuar një tryezë ekspertësh, dhe besoj se do te arrihet kompromisi dhe të enjten t’i jepet shqiptarëve ajo gjë e çmuar, që është reforma në drejtësi. Ne jemi fokusuar në dy ditët e mbetura që të gjendet rruga për të realizuar reformën në drejtësi. Tashmë po kërkohet kompromisi për nenin 88. Në rast se forcat politike nuk e gjejnë kompromisin për këtë pikë, ne jemi që t’i drejtohemi popullit për referendum”, tha deputeti Idrizi.
