Gjykata e Shkodrës, në seancën që është zhvilluar me dyer të mbyllura, ka vendosur masën “arrest me burg” për tre të arrestuarit si bashkëpunëtorë për atentatin ndaj Nard Polisë.
Alfred Martini, Gilbert Toma dhe Kleandro Toma dyshohen si bashkëpunëtorët e vrasjes së ndodhur disa ditë më parë.
Ndërkohë është identifikuar autori i dyshuar për vrasjen e sipërmarrësit. Ai është Kristian Sulaj dhe është vëllai i Alfred Martinit, por ka ndryshuar gjeneralitetet.
Sipas policisë, të tre të arrestuarit kanë ndihmuar Sulajn me armë, makinë si dhe i kanë ofruar strehim. Mendohet se Sulaj është arratisur jashtë Shqipërisë, duke kaluar nga pika kufitare e Murriqanit.
Ferdinant Polia (Nardi i Bujtinave) u ekzekutua më 20 Mars, në një pritë, tek vendi i quajtur Kthesa e Grudës. Ai mori 18 plumba në trup nga 20 që autori qëlliu me automatikun tip “Scorpions”.
Në makinë ndodhej dhe pronari i një servisi makinash, shoku i viktimës, Xhovani Mirashi, i cili u shpëtoi mrekullisht plumbave. Motori i autorit të dyshuar të ekzekutimit u gjet pak pas ngjarjes i shkrumbuar në zonën e Postribës. Ende nuk ka një motiv për vrasjen e Ferdinand Polisë. /Opinion.al
