Dy fëmijë të moshës 4-vjeçare kanë vdekur në mënyrë tragjike në Florida, pasi i zuri gjumi të përqafuar në një sënduk të madh prej druri, ku prindërit fusnin lodrat e tyre.
Autoritetet thonë se dy fëmijët nuk reagonin në shtëpi në Jacksonville, tha Zyra e Sherifit të Jacksonville në një deklaratë. Pavarësisht “përpjekjeve për t’i ringjallur, ato u shpallën të vdekur”, shtoi policia.
Vdekjen e fëmijëve e ka konfirmuar nëna e tyre me një postim në rrjetet sociale, ku shprehet e shqetësuar për ngjarjen absurde dhe përshkruan rrethanat në të cilat ka ndodhur tragjedia.
Në një postim në Facebook të dielën, nëna Sadie Myers tha ishte në punë të premten mbrëma kur burri i saj, Don Starr, i vuri në shtrat binjakët Aurora dhe Kellan dhe dy vëllezërit e tyre më të mëdhenj. Starr punonte gjatë ditës dhe Myers punonte natën në mënyrë që të mund të mbulonte shpenzimet e mëdha.
“Kur u ktheva në shtëpi nga puna disa orë më vonë, i shikova të gjithë fëmijët si zakonisht për t’u siguruar që po flinin, më pas hëngra darkën time dhe shkova të flija,” shkroi Myers. “Në një moment herët atë mëngjes, binjakët u zgjuan me njëri-tjetrin dhe vendosën se donin të luanin në dhomën e tyre në vend që të flinin.”
Siç shpjegon nëna e tyre në postimin e saj, disa mëngjese ajo i gjente binjakët duke fjetur në pjesë të ndryshme të çuditshme të shtëpisë, me kukullat e tyre të shpërndara rreth tyre.
“Të premten mbrëma, vendi i çuditshëm që ata zgjodhën për të rënë në gjumë ishte sënduku prej druri që ne përdorim për të ruajtur lodrat e tyre”, shkruan Myers.
Binjakët hoqën thuajse të gjitha kukullat nga sënduku, duke lënë vetëm disa në fund të ishin më të buta. Më pas ata u shtrinë dhe i zuri gjumi në krahët e njëri-tjetrit.
Kur Myers u zgjua në mëngjes ka gjetur krevatet e fëmijëve bosh, ajo menjëherë u panikos.
E gjithë familja filloi të kërkonte dy fëmijët, duke bërtitur emrat e tyre brenda shtëpisë. Më në fund, një nga vëllezërit e tyre më të mëdhenj hapi sëndukun dhe i gjeti brenda.
Në fillim, djali mendoi se binjakët thjesht po flinin dhe thirri mamin i gëzuar. Por kur gruaja pa binjakët, e kuptoi që ato nuk po merrnin më frymë dhe ishte tepër vonë për t’i shpëtuar./Opinion.al
