Nën akuzën “Shtrëngim me anë të kanosjes për dhënie pasurie”, në kuadër të grupit të strukturuar kriminal janë vënë në pranga, sapo kanë dalë nga burgu ku kishin zhvilluar një takim me Shullazin, dy anëtarë të bandës së këtij të fundit.
Lajmin e ka bërë me dije Prokuroria, e cila sqaron se me kërkesë të Prokurorisë për Krime të Rënda, gjykata ka vendosur masën e sigurisë “arrest në burg” për shtetasit Endrit Qyqja dhe Endrit Zela. Vendimi i
gjykatës është zbatuar nga ana e forcave të Policisë së Tiranës mesditën e së Enjtes.
Dy të arrestuarit e sotëm, në bashkëpunim me shtetasit Emiljano Shullazi e Gilmano Dani, si edhe për llogari të këtyre të fundit, i kanë marrë shuma të konsiderueshme parash një biznesmeni, nëpërmjet kërcënimit dhe dhunës fizike.
Prokuroria për Krime të Rënda është duke zhvilluar hetime për një grup të strukturuar kriminal, i dyshuar për “gjobvënie”. Gjatë këtij hetimi, fillimisht janë arrestuar shtetasit Emiljano Shullazi, Gilmano Dani dhe Blerim Shullazi.
