Rikthimi i saj në Shqipëri për moderimin e spektaklit “Dancing With The Stars” ishte i shumëpritur për publikun shqiptar. Por duket se gjërat nuk kanë shkuar ashtu siç ishin planifikuar për Almeda Abazin dhe shkak është bërë shtrimi në spital i bashkëshortit të saj, Tolgahan Sayisman.
Mësohet se aktori i famshëm turk do të nisej drejt Afrikës për të takuar një grup të madh fansash në Angola dhe paraprakisht, ishte vaksinuar kundër sëmundjeve të rrezikshme që ndodhen në kontinentin afrikan. Por vaksina i ka shkaktuar atij një reaksion të rëndë alergjik dhe Tolgahan është dërguar me urgjencë në spital me temperaturë tepër të lartë. Në këtë situatë, Almeda është nisur drejt Turqisë për të qenë pranë tij, duke braktisur kështu për pak kohë spektaklin “Dancing With The Stars”.
Kjo pasi me shtrimin në spital, bashkëshortit të saj iu desh të anulonte udhëtimin drejt Shqipërisë për të qenë pranë saj. Megjithatë, situata duket se është normalizuar për Sayisman, pasi sipas mediave turke, mjekët e kanë këshilluar vetëm që të bëjë disa ditë pushim derisa trupi i tij të rikthehet në gjendjen e mëparshme.
