Policia e Durrësit ka arrestuar një 22-vjeçar, pasi plagosi me sende të forta, në bashkëpunim me vëllain, një shtetas duke i shkaktuar plagë të rënda.
Kapja e 22-vjeçarit u realizua në kuadër të operacionit policor të koduar “Brothers”.
Ndërkohë vijon puna për kapjen e shtetasit M.M, i shpallur në kërkim.
“Në zbatim të planit të masave për kontrollin e territorit, me qëllim goditjen e veprimtarive kriminale dhe kapjen e shtetasve të shpallur në kërkim, u finalizua operacioni policor i koduar “Brothers”.
Si rezultat, u kap dhe u vu në pranga një prej vëllezërve të shpallur në kërkim për veprën penale “Plagosje e rëndë me dashje”, e kryer në bashkëpunim, konkretisht shtetasi D. M., 22 vjeç, banues në Durrës, i cili ishte shpallur në kërkim pasi Gjykata e Shkallës së Parë të Juridiksionit të Përgjithshëm Durrës, me vendim të datës 16.10.2023, kishte caktuar masën e sigurisë “Arrest me burg”.
Ky shtetas, në bashkëpunim me vëllain e tij, shtetasin M. M., më datë 13.08.2023, ka goditur me sende të forta shtetasin Sh. Ç., duke i shkaktuar dëmtime të rënda.
Vijon puna për lokalizimin dhe kapjen e shtetasit M.M, i shpallur në kërkim”, njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme./Opinion.al
