Avokati i Popullit ka reaguar pasditen e sotme në lidhje me ngjarjen e rëndë në qytetin e Pogradecit, ku i riu Egli Proga u dhunua për vdekje dy ditë më parë.
Përmes një postimi në rrjetet sociale, Avokati i Popullit shpreh shqetësim lidhur me ngjarjen dhe bën të ditur se ka nisur një verifikim i plotë mbi veprimet dhe procedurat e ndjekura nga organet kompetente në këtë çështje.
Sipas njoftimit, ky verifikim do të synojë të hedhë dritë mbi të gjitha aspektet e ngjarjes.
Postimi i plotë:
Institucioni i Avokatit të Popullit shpreh shqetësimin e thellë lidhur me ngjarjen e rëndë të ndodhur në Pogradec, ku një qytetar humbi jetën në rrethana të dyshimta.
Në veçanti, Avokati i Popullit shpreh shqetësim për pretendimet e ngritura nga familjarët e viktimës dhe një pjesë e opinionit publik në Pogradec, lidhur me mundësinë e fshehjes apo manipulimit të ngjarjes nga strukturat e policisë lokale.
Avokati i Popullit, si institucion i pavarur kushtetues, jo vetëm ka për detyrë të mbrojë të drejtat e njeriut por edhe të garantojë transparencë dhe drejtësi në çdo rast ku mund të jenë shkelur këto të drejta.
Përsa më sipër Avokati i Popullit njofton se ka nisur një verifikim të plotë mbi veprimet dhe procedurat e ndjekura nga organet kompetente në këtë çështje.
Ky verifikim do të synojë të hedhë dritë mbi të gjitha aspektet e ngjarjes, përfshirë edhe pretendimet për moszbardhjen e drejtë të situatës.
