Një 23-vjeçar shqiptar është arrestuar në Irlandë pasi është kapur më një sasi droge në banesë.
Për të shpëtuar veten nga dëbimi, 23 vjeçar shqiptar ka bërë një kërkesë të çuditshme para gjykatës.
Kur gjykatësi e pyeti Ergis Metajn, 23-vjeç se pse kërkonte azil në Irlandë, ai u përgjigj se kishte një problem me njerëzit e gruas së tij në Shqipëri.
“Nën çfarë lloj kërcënimi jeni?”, pyeti gjykatësi Johnson.
“Ka të bëjë me seksualitetin tim. Unë jam biseksual”, u shpreh Metaj cituar nga mediat vendase.
Hetuesi Leo Mulrooney i tha gjykatës se kishte një urdhër dëbimi për të pandehurin dhe do të hynte në fuqi kur të skadonte çdo dënim i shqiptuar.
Media irlandeze shkruan se i pandehuri kishte përshtypjen se mund të qëndronte në Irlandë, por një urdhër dëbimi duhej të pritej në këtë lloj rasti.
I riu shqiptar u kap në flagrancë me kanabis me vlerë 119,736 euro të dorëzuar në një kuti në banesën e tij në Sligo. Një bandë shqiptare droge, siç u tha në gjykatë e kishte postuar pakon në Sligo me korrier, por ajo u kap në Aeroportin e Dublinit dhe policia vendosi ta vinte nën vëzhgim deri në dorëzimin e kontrolluar, duke çuar më pas në arrestimin e Metaj më 22 mars të vitit të shkuar, një vit pasi mbërriti në Sligo me gruan e tij duke kërkuar azil.
