Kanye West ka filluar zyrtarisht fushatën e tij për zgjedhjet presidenciale të SHBA 2020, me një miting jo të zakonshëm në Charleston, Karolina e Jugut.
Gjatë fjalës së tij, reperi 43-vjeçar foli për vendime mbi politikën, duke përfshirë abortin dhe marëdhëniet racore dhe teologjinë.
Fansat kanë vënë në dyshim nëse kandidatura e tij e minutës së fundit për Shtëpinë e Bardhë është në të vërtetë një marifet promovues.
West u shfaq me “2020” të rruar në pjesën e pasme të kokës, kishte veshur një jelek sigurie anti-plumb, dhe iu drejtua turmës së mbledhur pa mikrofon.
Nuk kishte as mikrofonë audiencash, duke bërë që West të përsëriste vazhdimisht turmës që të heshtë, në mënyrë që të mund të dëgjonte pyetjet që bëheshin.
Në një moment ai filloi të qante kur fliste për abortin, duke thënë se prindërit e tij pothuajse e abortuan: “Nuk do të kishte Kanye West, sepse babai im ishte shumë i zënë”.
Ai shtoi: “Unë gati e vrava vajzën time … edhe nëse gruaja ime [Kim Kardashian West] do të ndahej nga unë pas kësaj fjalimi, ajo solli në jetë vajzën North, edhe pse unë nuk doja.”
Megjithatë ai pastaj shtoi se ai beson se aborti duhet të mbetet i ligjshëm, por duhet të ketë mbështetje financiare për nënat e reja që luftojnë – duke sugjeruar që “të gjithë ato që sjellin në jetë një fëmijë marrin një milion dollarë”.
“E vetmja gjë që mund të na çlirojë është të respektojmë rregullat që na janë dhënë për një tokë të premtuar,” tha ai. “Aborti duhet të jetë legal sepse e dini çfarë? Ligji nuk është nga Zoti, pra çfarë është ligjshmëria?”
Në një moment tjetër, ai dha një monolog ekspresiv rreth abolicionistes së shekullit XIX Harriet Tubman.
“Harriet Tubman asnjëherë nuk i liroi skllevërit, ajo thjesht i detyroi skllevërit të shkonin të punonin për njerëzit e tjerë të bardhë,” tha ai.
Tubman lindi në skllavëri, por arriti të shpëtojë nga një plantacion i Maryland në 1849, në moshën 27. Ajo pastaj u kthye në Jug për të shpëtuar skllevërit e tjerë në rrjetin e rrugëve dhe shtëpive të sigurta të njohura si “hekurudha nëntokësore”, duke rrezikuar vetë jetën e saj për të udhëhequr njerëzit drejt lirisë.
West gjithashtu u përlot kur fliste për nënën e tij të ndjerë, e cila vdiq në 2007 nga komplikimet gjatë operacionit kozmetik.
West, i cili njoftoi kandidaturën e tij në 4 korrik, tashmë ka humbur afatin për t’u kualifikuar për zgjedhje në disa shtete. Ai duhet të mbledhë nënshkrime të mjaftueshme për të dalë në fletëvotim në një numër shtetesh të tjerë.
Javën e kaluar ai u kualifikua të paraqitej në fletën e votimit presidencial të Oklahoma, shteti i parë ku ai plotësoi kërkesat përpara afatit.
Për të dalë në fletën e votimit të Karolinës së Jugut, ai duhet të mbledhë 10,000 nënshkrime deri në mesditën e së hënës. /Opinion.al
