Forca të shumta të policisë kanë kryer një aksion për kapjen e Suel Çelës, i cili është në kërkim për disa ngjarje kriminale të ndodhura në vend.
Sipas A2 CNN, forcat e policisë kanë zbarkuar në tregun agro-ushqimor në Elbasan dhe në shtëpinë e personit të shumëkërkuar për kontrolle.
Ende nuk dihet nëse Çela është gjetur apo arrestuar pasi policia është e rezervuar në dhënien e informacionit.
Suel Çela kërkohet prej disa vitesh si person i dyshuar i përfshirë në ngjarje kriminale.
Në maj të vitit 2022 ai u shpall në kërkim në kuadër të operacionit “Plumbi i Artë” të organizuar nga SPAK. Sipas dëshmisë së Nuredin Dumanit ai është porositës i tre ngjarjeve 2 të parealizuara dhe 1 e mbetur në tentativë. Suel Çela akuzohet se ka porositur atentatin e dështuar të 29 marsit 2022 ndaj Elton Kilës, që do të kryhej nga bashkëpunëtori i drejtësisë, Nuredin Dumani, i cili mbeti i plagosur rrugës dhe më pas u arrestua.
Një tjetër krim i porositur nga Suel Çela është ajo e tentativës për të vrarë administratorin e shkollës private Lulzim Masha. Skerdi Tase, dyshohej si vrasës me pagesë në këtë rast. Suel Çela nga Elbasani, rezulton i dënuar në Itali për trafikim narkotikësh, por ai ka arritur t’i shpëtojë burgut.
Po ashtu Suel Çela ka qenë i akuzuar për sulmin ndaj policisë tek tregu ushqimor i Elbasanit. Ngjarje kjo që tronditi opinionin publik në shtator 2017 kur dolën pamjet e Audit të zi, të blinduar që përplasi makinën zëvendësdrejtorit të policisë Gjergj Oshafi. Edhe pse prokuroria kërkoi 7 vite burg, gjykata vendosi ta shpallë të pafajshëm Çelën për mungesë provash, ndërsa dënoi shokun e tij si autor të ngjarjes.
