I nxehti afrikan që përfshiu Europën në fund të korrikut, i ka kushtuar jetën qindra personave në Holandë.
Sipas Institutit Kombëtar të Statistikave CBS, në total 2964 persona ndërruan jetë në Holandë në javën e nisur nga 22 korriku, 400 më shumë se mesatarja në një javë normale vere.
Bilanci i vdekjeve në vend gjatë javës në fjalë është i krahasueshëm me atë që u regjistrua gjatë dy valëve të të nxehtit në vitin 2006-të që ishin edhe më të gjatat në histori. Shumica e viktimave ishin të moshuar, ndërsa rastet më të shumta u shënuan në lindje të vendit ku temperaturat ishin më të larta dhe zgjatën më shumë.
Temperatura të paprecedenta përfshinë kontinentin e vjetër muajin që lamë pas dhe për herë të parë ne Holandë termometri i kaloi 40 gradët në 25 korrik. Vala e të nxehtit ishte e dyta që goditi Europën në një muaj dhe specialistët e klimës paralajmërojnë se fenomene të tilla mund të bëhen më të zakonshme për shkak të ngrohjes se planetit nga emetimet e gazrave me efekt serrë./Opinion.al
