Deputeti socialist Alfred Peza reagoi sot për akuzat që ka ngritur prokuroria ndaj tij për ‘fshehje pasurie’ dhe ‘pastrim parash’. Sipas tij, ai po hetohet për mënyrën se si i ka vënë paratë në kohën kur punonte si gazetar dhe jo për 4 vitet e fundit, kur ai është deputet i PS në parlament. Sipas tij ky është një rast i parecendet pasi asnjë gazetar deri më sot nuk është hetuar për mënyrën se si e ka vënë pasurinë. Peza tha se objekt i hetimit janë të ardhurat nga puna në media, duke shtuar se gjatë 4 viteve në parlament nuk ka përfituar asnjë fond apo tender publik.
Pjesë nga deklarata e Pezës
“Tashmë edhe nga organi i prokurorisë është provuar se ka zero shtim të pasurisë time përveç rrogës së deputetit nga momenti i shpalljes publike të kandidaturës time dhe deri më sot. Kjo duhet kuptuar mirë, sepse kemi të bëjmë me një fakt të pakundershtueshëm. Unë po hetohem si gazetar dhe jo si deputet. Kjo do të thotë se Prokuroria nuk ka asnjë problem me deputetin dhe politikanin Alfred Peza, por po heton gazetarin Alfred Peza. Kjo është e paprecedentë. Tani Prokuroria është duke hetuar sesi ka vënë një gazetar pasurinë në Shqipëri. Këto që po hetohen sot, mund të ishin hetuar fare mirë që në vitin 2012”.
