Bashkëshortja e Vasil Bibës, biznesmenit të vrarë në Dajt, është marrë në pyetje dje për rreth 4 orë në Drejtorinë e Policisë së Tiranës.
Ajo është pyetur jo vetëm si person që mund të ndihmojë për hetimet, por edhe si person që mund të ketë dijeni për ngjarjen.
Fillimisht është bërë verifikimi i deklarimit që ajo kishte dhënë para dy muajsh në Komisariatin nr.4, kohë kur denoncoi zhdukjen e bashkëshortit.
Burimet e policisë thanë se Elsa Biba është shprehur se largimi i të shoqit nga shtëpia, zhdukja e tij, por edhe vrasja, mund të kenë lidhje me borxhet që ai u kishte disa personave.
“Im shoq kishte probleme me shumë njerëz, për shkak të disa borxheve të mëdha që u detyrohej. Ka pasur raste që ata na vinin edhe në shtëpi. Kanë ardhur edhe gjatë kohës që Vasili paska qenë i vdekur”, ka deklaruar 29-vjeçarja para oficerëve të policisë.
Megjithatë, ajo ka deklaruar se dyshimet e saj janë tek ata persona që i shoqi u kishte borxh dhe gjatë kësaj kohe nuk ka pasur kontakte me ta.
“Ata që më kanë ardhur në shtëpi gjatë këtyre dy muajve, nuk mund të jenë vrasësit e Vasilit, pasi nuk do të vinin ta kërkonin në rast se do të ishin ata autorët.
Unë dyshoj tek ata që nuk janë dukur për 2 muaj dhe që e di se im shoq u detyrohej shuma të mëdha parash”, është shprehur Elsa Biba.
Ndërsa e pyetur nëse kishte dijeni për ndonjë kërcënim që mund të ketë marrë i shoqi para se të humbiste kontaktet me të, ajo ka pohuar duke thënë se i dinte disa raste, por nuk i njeh personat që e kërcënonin.
DEKLARIMET
Elsa Biba, bashkëshortja e viktimës, është parë me dyshim nga grupi hetimor, nisur edhe nga deklarimet që ka dhënë dy muaj më parë, për zhdukjen e të shoqit.
Shumë prej përgjigjeve që ajo ka dhënë para hetuesve janë parë me dyshim, duke u krahasuar me deklarimin e më parshëm të saj. Edhe në dhjetor, kur ajo denoncoi humbjen e bashkëshortit, nuk ka qenë shumë e qartë rreth atyre që pretendonte, madje në disa raste nuk ka bashkëpunuar me policinë.
Ajo është paraqitur në Komisariatin nr.4 për të denoncuar largimin e të shoqit nga shtëpia rreth një javë pasi kishte humbur kontaktet. E pyetur se përse kishte shkuar kaq vonë, kur nuk kishte folur me bashkëshortin që prej datës 1 dhjetor, ajo ishte përgjigjur: “Ai largohej vazhdimisht, ikte edhe jashtë, por nuk vonohej kaq shumë. Largohej për shkak të borxheve. Këtë mendova edhe këtë herë. Por kur u vonua më shumë se zakonisht, u shqetësova dhe vendosa të denoncoja”.
Nga ana tjetër, ajo kishte refuzuar t’i jepte numrin e telefonit oficerit që i ka marrë deklarimin.
Madje, as fotografinë e të shoqit, apo adresën e saktë se ku banonin. Kjo ka ngjallur dyshime te grupi hetimor, edhe pse nuk e bën të dyshuar të drejtpërdrejtë për ngjarjen./ Panorama.al
