Qerasja me “një vizë” është tendenca më e fundit “e modës” në lokalet luksoze në zonën e ish-Bllokut dhe në zonat më të preferuara të kryeqytetit. Nëse dikur vajzat e reja bukuroshe që frekuentojnë me shumicë lokalet në këto zona “gënjeheshin” më pije të shtrenjta, koktejle të ndryshme, ofrimi edhe i një doze kokaine “të pastër”, tashmë është kthyer në normalitet.
Më të kujdesshmit “vizën” e konsumojnë në tualetet e lokaleve, apo duke u shkëputur për pak minuta drejt makinës që kanë parkuar aty rrotull. Të tjerë e kryejnë ritualin edhe mbi tavolinat në lokalet e zhurmshme, përherë të mbipopulluara në orët e vona të natës. Edhe “mbledhkat” nëpër apartamente janë një mënyrë e përhapur gjerësisht në kryeqytet, ku të rinj të “sponsorizuar” nga ata që e kanë “lekun letër”, konsumojnë në mënyrë të shfrenuar, alkool, marihuanë dhe “viza”.
E gjitha po ndodh gati “legalisht” në sy të agjentëve të policisë që operojnë në këto zona. Toleranca bëhet nën justifikimin e “përdorimit vetjak”, por në shumicën e rasteve këta agjentë janë vetë pjesë e këtyre rrjeteve të shpërndarësve. Herë si “mbyllje të syve”, kundrejt një pagese të rregullt mujore dhe në raste të tjera duke qenë vetë brenda skemës.
Klientët më të rregullt janë tipa që nuk e fshehin se kanë miliona nga punë të pista, si dhe fëmijë politikanësh dhe biznesmenësh, të cilët vërtiten në jetën e natës së “Bllokut” duke shpenzuar me vajza të reja veçanërisht studente.
Burime brenda policisë thonë për “SYRI.net”, se Gjergj Cukali, ishte një “peshk i vogël”, i cili i përkiste kategorisë më të ulët të kontigjentëve të policisë.
Gjithsesi dhe Cukali kishte arritur të ndërtonte “linjën” e tij të shpërndarjes së kokainës në “Bllok” duke fituar, mbi 1 milion euro në vit. Zonat ku operonte ai, sipas policisë ishin pikërisht ato për të cilat po flasim; “Myslym Shyri”, ish-Blloku, sheshi “Willson”, në rrugën “Ali Demi”, në zonën e Porcelanit dhe në rrugën e Elbasanit. Por Cukali, nuk kishte arritur të depërtonte dot në “shtresat e larta. Furnizuesit e tyre janë të paprekshëm.
Por moda “vizës” me shumicë në zonën e Bllokut, prej kohësh nuk është më lajm. As legalizimi që policia i ka bërë kësaj tregtie. Këmbana e alarmit bie për familjet e të rinjve që frekuentojnë rregullisht jetën e natës në këto zona. Ofruesit e “vizave”, kanë arritur që ta shndërrojnë këtë akt, si një modë joshëse, të parrezikshme njësojë si frekuentimi i PUB-eve me emër, koktejlet e shtrenjta, veshjet firmato, apo një xhiro me një makinë luksoze.
Ashtu si gjithë Tirana edhe krerët e policisë shqiptare e dinë këtë fakt. Ka ardhur koha sa nuk është tepër vonë që të ndërhyjnë. Nëse nuk e bëjnë dot se nuk i lejojnë, le ta mendojnë njëherë si prindër. Edhe për faktin që, “moda e vizës”, më të lehtë e ka të kap fëmijët e atyre që mendojnë se janë “mbi kalë”.
