Ish-ministri i Drejtësisë, Nasip Naço ka reaguar në lidhje me dëshminë e bërë në GJKKO nga i penduari Nuredin Dumani.
Ai rrëfeu se mundi të lirohej nga qelia në vitin 2014, kur ishte arrestuar për pengmarrje, me ndihmën e dhëndrit të vëllait të Nasip Naços.
Në atë kohë, tregon Dumani, për të është siguruar një dokument ku tregonte se ai kishte probleme të rënda shëndetësore.
Për këtë dëshmi, Naço deklaron përmes një reagimi në “Facebook” se distancohet nga çdo akuzë dhe se fton organet e drejtësisë së të hetojnë këtë çështje dhe të merren masa ligjore ndaj çdo personi që vërtetohet se është i përfshirë në këtë rast.
Reagimi i Nasip Naço
Jam njohur sot nga mediat ku përmendet emri im. Dua të theksoj se:
- Distancohem nga çdo akuzë e bërë publike sot dhe ftoj organet e drejtësisë që të kryejnë një hetim të thelluar mbi këtë rast. Nëse akuzat vërtetohen, organet përkatëse duhet të marrin masa ligjore ndaj çdo personi të përfshirë në këtë çështje.
- Roli i Ministrit të Drejtësisë, sipas legjislacionit në fuqi, është i kufizuar. Ministri:
– Nuk heton,
– Nuk ngre akuza,
– Nuk pushon çështje,
– Nuk jep vendime fajsie apo pafajsie.
Detyra e tij lidhet vetëm me dhënien e lejeve të veçanta për të dënuarit, bazuar në ligj.
- Gjatë ushtrimit të detyrës sime si Ministër i Drejtësisë, nuk kam miratuar asnjë leje të veçantë për subjektin në fjalë.
- Distancohem nga çdo mashtrim, i bërë nga kushdo, individualisht apo në bashkëpunim, për të dëmtuar integritetin tim. Akuzat publike të bëra sot nuk përputhen me faktet reale të ushtrimit të detyrës sime si Ministër.
