Ish-futbollisti i Kombëtares Shqiptare të Futbollit, Andi Lila, i cili më herët ka qenë i angazhuar pranë Partisë Demokratike, këtë të martë është shfaqur krah kryebashkiakut të Tiranës dhe njëherazi kandidatit të PS për kryeqytetin Erion Veliaj.
Lila ka qenë i pranishëm gjatë një takimi të zhvilluar në Kavajë, ku i pranishëm ka qenë edhe kreu i grupit parlamentar të PS, Taulant Balla, dhe ka folur në mbështetje të dy kandidateve të PS, Redjan Krali në Kavajë dhe Edison Memolla në Rrogozhinë.
“Edisoni ka qenë portier me Rrogozhinën, jemi pothuajse moshatarë dhe shpesh herë i bëj edhe ndonjë gol. Qyteti i Rrogozhinës ka një skuadër që quhet Egnatia, nga më të mirat e kampionatit shqiptar, dhe realisht është një nga skuadrat që unë simpatizoj, jo sepse jam nga zona, po sepse e keni ndërtuar me të vërtetë shumë mirë. Ndërsa, për sa i përket Redit, atë e kam shok shkolle, shok të vjetër. Patjetër që një ndër gjërat që Redi më ka premtuar, jo vetëm mua si ish-futbollist i Besës, por edhe të gjithë sportistëve, që stadiumin e Kavajës do ta bëjë të ri dhe për këtë gjë patjetër që do ketë gjithë mbështetjen tonë. Janë dy çuna që janë fjalëpak e punëshumë”-tha Lila.
Kujtojmë se në prag të zgjedhjeve parlamentare të 25 prillit 2021, Andi Lila ka qenë një ndër figurat publike që është angazhuar në fushatën elektorale të Partisë Demokratike. Madje ai u zgjodh nga kryetari i atëhershëm i PD, Lulzim Basha, si koordinator i PD për sportin./Opinion.al
