Kompleksi “Golden Resort” në Xhafzotaj, një karburant dhe një vilë dy katëshe në Pjezë të Shijakut, të cilat janë në pronësi të Altin Hajrit, njëri prej personave të shpallurve në kërkim si i dyshuar për rrëmbimin e Jan Prengës, do të sekuestrohen.
Vendimi u mor nga Gjykata e Posaçme kundër Korrupsionit dhe Krimit të Organizuar dhe sekuestrimi i pasurisë bëhet në bazë të elementit të urgjencës të parashikuar në Ligjin Special. Me vendosjen e kësaj mase sekuestroje, objektet kalojnë automatikisht në administrim të Agjencisë së Administrimit të Aseteve.
Altin Hajri është shpallur në kërkim nga policia për akuzën “rrëmbim ose mbajtje peng e personit e kryer në bashkëpunim”, e cila lidhet me rrëmbimin e më pas vrasjen e Jan Prengës.
Hajri rezulton po ashtu se është i dënuar me burg nga autoritet italiane të drejtësisë, me urdhër arrestin e datës 15.08.2015, për akuzën “Trafikimi i lëndëve narkotike, kryer në bashkëpunim”./Opinion.al
