Partizani humbi 1-2 me Laçin me përmbysje për javën e 20-të të Superligës.
Nga “Arena e Demave”, trajneri Orges Shehi tha se skuadra duhet të jenë më të frikshëm para portës, duke theksuar rastet e humbura. Për durrsakun kjo ishte humbja e parë në stolin e të kuqve.
“Kemi shpërdoruar shumë. Në atë moment kur duhet të mbyllnim ndeshjen, filluam t’i jepnim zemër kundërshtarit. Më vjen keq që hymë në presion duke humbur raste. Të rrimë të qajmë mungesat, mendoj se është e pavend. E kishim ndeshjen në dorë, mund ta kontrollonim më mirë. Shkon situata ndryshe nëse shënon. Duam të dalim para portës, por aty duam të finalizojmë. Hymë në presion duke humbur raste. Pastaj sigurisht që lojtarët që futen duhet të ndryshojnë marshin. Duhet të kenë një egërsi më shumë. Duhet ta kishim zgjidhur më mirë, sidomos vendosjen në mbrojtje. Do mësohem me këto situata, kështu që na mbetet vetëm të punojmë. Futbolli i tillë është, ndonjëherë humb atëherë kur nuk e meriton. E humbëm ndeshjen nga butësia jonë”,-tha Shehi.
