Ish-trajneri i kombëtares së futbollit Astrit Hafizi ka bërë analizën e tij për ndeshjen Spanjë Shqipëri menjëherë pas takimit në studion e Supersport. Sipas tij trajneri Panucci gaboi me rrethimin me 5 mbrojtës në pjesën e parë.
“Mua më duket një humbje më se normale në rezultat. Nuk pritej të bënin më tepër në rezultat. Gjithsesi Panucci e ndërtoi keq në fillim formacionin në nisje të takimit. Në pjesën e dytë skuadra morri emër. Ai ndoshta nuk i ka të qarta ende disa karakteristika të lojtarëve. Që sa pashë skemën në nisje thashë që kishte gabime. Hysajt nuk mund t’i vësh pranë Balliun. Edhe golat e Spanjës në pjesën e parë erdhën aty ku kishim ne më shumë lojtarë. Lojtarët ishin të ngathët dhe nuk e kuptonin njëri tjetrin.
Në pjesën e dytë Spanja bëri një hap prapa për të kursyer energji. Ajo që mund të them është se ne nuk kemi lojtarë që mund të bëjnë diferencën. Kjo do të thotë që atë rast që kemi përpara portës ne ta shfrytëzojmë. Ka edhe arsye subjektive. Pati lojtarë që munguan për shkak dëmtimesh dhe kartonash që e detyruan Panuccin të bënte atë që beri. Por unë mund të them se Panuci e nëdrtoi gabim skuadrën në pjesën e parë.
Kemi luajtur më mirë se në ndeshjen e parë në Shkodër. Kemi pasur 6 korne dhe goditëm dy herë shtyllën. Për mua ky rezultat është më i pranueshëm se humbja në Shkodër. Pozicionet e pjesës së parë? Pse ne duhet të vëmë kaq shumë lojtarë prapa pa e ditur se si do të luajë Spanja” – tha Hafizi.
