Humbi jetën në taracë/ Qëlluan me armë zjarri, policia ndalon tre shtetas

Policia e Kurbinit ka ndaluar tre persona të cilët mbrëmjen e ndërrimit të vitit qëlluan me armë në ajër. Ndalimet janë kryer pikërisht në lagjen ku humbi jetën 16 vjeçari i cili u gjet në taracë me plagë në kokë, të cilat me sa duket janë shkaktuar nga armë zjarri. Tre personat e ndaluar u ndaluan nga Policia ndërsa po lëviznin me një mjet tip Benz pa targa. Të ndaluarit me mbiemër Lika, janë të afërm me njëri-tjetrin. Një nga provat që Policia ka në dorë është edhe një video që të rinjtë kanë hedhur në rrjetet sociale natën e ndërrimit të viteve, ku shfaqen duke qëlluar me armë zjarri në ajër, K. Gj, 16 vjeç, banues në lagjen Sanxhak, ishte ngjitur në taracë për të parë fishekzjarret por më pas u gjend nga familjarët i pajetë me një plagë tejshpuese në kokë. Ndërkohë që pritet që ekspertiza mjeko-ligjore të përcaktojë shkaqet e vdekjes.