Të gjithë jeni padyshim tifozë të ekipit tuaj të zemrës dhe me siguri që secili prej jush, të paktën një herë ka vajtur në stadium për të
mbështetur skuadrën e preferuar. Por, historia që mbërrin nga Anglia mund të mirëkuptohet vetëm nga ata tifozë që kanë përjetuar
atmosferën në zonën ultras në stadiume, aty ku mbretëron ajri magjik, me një situatë gati mistike e të pashpjegueshme, sidomos në
ndeshjet në transfertë.
Ekzaltimi i përjetuar në zemër të tifozllëkut më të nxehtë të çdo tifozërie, shumë herë shndërrohet në një gëzim të shfrenuar që përfshin të
gjihtë. Sa herë, pas një goli të idhullit të ekipit tuaj të zemrës, e keni gjetur veten të paktën tre rreshta më poshtë ndenjëses tuaj në stadium,
të përfshirë dhe të shtyrë nga ekzaltimi i turmës në përgjithësi? Apo, sa herë mes skenave të përqafimeve dhe shkundjeve mes të njohurve
dhe të panjohurve me të cilët ndani zonën ultras, jeni kthyer në shtëpi të mbuluar me rroba të grisura, të mavijosur dhe gërvishtur, vetëm
pse ekipi juaj i zemrës kishte shënuar gol? Gjithsesi, të gjitha këto, për ju që jeni tifozë dhe që keni përjetuar atmosferën në stadium, janë
skena të para dhe të përjetuara. Por, ajo që shkaktoi Marcus Rashford, në derbin e Manchester, është vërtetë e rrallë.
Pikërisht gjatë festimeve ekzaltuese të turmës së tifozëve të Manchester United për golin e shënuar nga futbollisti 19vjeçar i djajve të kuq
në ndeshjen derbi, një tifoz i United e ka pësuar vërtetë shumë rëndë. Shumë shtrenjtë e ka paguar një tifoz i djajve të kuq, të cilit, festimet,
të qeshurat, përqafimet, hedhjet dhe brohoritjet i kanë kushtuar dhëmbin e parë, teksa është goditur në ekzaltim e sipër nga një tjetër tifoz i
sektorit të miqve në “Etihad Stadium”. Por, tifozi i pafat u shndërrua menjëherë në hitin e rrjeteve sociale, teksa në stadium, me dhëmbin në
dorë, ka publikuar menjëherë një foto duke qeshur.
