Kryeministri i Kosovës, Avdullah Hoti thotë se caku i dialogut me Serbinë është njohja reciproke dhe normalizimi i marrëdhënieve.
Në një status në Facebook, ai iu është përgjigjur kritikave që u ngritën pas takimit të tij me Presidentin serb , Alkesandër Vuçiç në Bruksel.
Ndër të tjera Hoti thotë se qeveria që ai udhëheqë ka hequr nga diskutimet integritetin territorial të Kosovës.
“Askush nuk duhet të trazohet nga normaliteti që po ndërtojmë, sepse është edhe në të mirën e tyre.
Për një muaj, ne e rikthyem Kosovën aty ku e ka vendin, përkrah miqve tanë ndërkombëtarë. Nga një raport i lënduar me BE dhe SHBA, tani kemi mbështetje nga të gjithë për cakun e dialogut, që është njohja reciproke dhe normalizimi i marrëdhënieve.
Për një muaj, ne hoqëm nga çdo diskutim temën e integritetit territorial të Kosovës, të cilën më nuk e përmend kush.
Me vendosmëri e guxim, ne e evituam rrugën qorre dhe qasjen izoluese dhe morëm përgjegjësitë shtetërore në dialog. Këtë e bëmë pa hezitim pasi udhëhiqemi nga parimi i ruajtjes së integritetit territorial dhe unitaritetit të shtetit, si dhe nga respektimi i plotë i kushtetutshmërisë.
Kjo është qasja jonë në dialog, që është legjitime dhe e vetme. Koha e politikës izoluese dhe e frikës për t’u përballur është tashmë pas nesh.
Parimet e qarta dhe sinqeriteti ynë përballë partnerëve ndërkombëtarë po na mundësojnë ecjen tonë krah tyre dhe po na sigurojnë garancinë për proces dialogues në interesin më të mirë të Republikës së Kosovës dhe qytetarëve të saj.
Kjo do të jetë një marrëveshje që Kosovës i jep atë që i takon, të qenurit e barabartë dhe e integruar në familjen e madhe euroatlantike. Për këtë ka nevojë populli i Kosovës.”
Partitë opozitare në Kosovë, Lëvizja Vetëvendosje dhe Partia Demokratike e Kosovës kanë kritikuar Hotin për raundin e ri të dialogut në Bruksel, që u zhvillua më 16 korrik.
LVV dhe PDK kanë thënë se Hoti nuk është i përgatitur dhe nuk ka platformë të qartë për dialog.
Edhe këshilltari i presidentit Hashim Thaçi, Bekim Çollaku ka kritikuar Qeverinë e Kosovës, pasi Bashkimi Evropian paralajmëroi se dialogu i nivelit teknik do të rikthehet më 22 korrik.
Çollaku tha se Kosovës i duhet marrëveshja përfundimtare dhe jo një dialog teknik, që sipas tij, nuk është në interes të shtetit.
Më 16 korrik, pas 20 muajsh, Kosova dhe Serbia zhvilluan raundin e ri të bisedimeve për normalizimin e marrëdhënive.
Hoti, që u takua me presidentin e Serbisë, Aleksandar Vuçiq, me ndërmjetësimin e BE-së, tha se në këtë takim është folur për të zhdukurit dhe ekonominë.
