Statistikat e shërbimeve për tremujorin e parë 2025, INSTAT: Pasuritë e paluajtshme, rritet indeksi i punësimit me 6,6%
Instituti i Statistikave ka dalë me një raport për shërbimet e tremujorit të parë të vitit 2025.
Në një statistikë afatshkurtër të bërë, janë bërë krahasimet e indekseve të shitjeve neto, punësimit dhe pagave të pesë aktiviteteve të reja ekonomike: programim dhe shpërndarje, pasuri e paluajtshme, aktivitete ligjore dhe kontrabiliteti, sigurim dhe hetim, si dhe administrim zyrash dhe shërbime mbështetëse. Këto statistika, janë krahasuar me rezultatet e tremujorit të parë të vitit 2024.
Këtu, rritjen më të madhe të indeksit të shitjeve neto e ka pësuar aktiviteti administrim zyrash, mbështetje administrative me 14,3%, krahasuar me të njëjtën periudhë një vit më parë. Në vend të dytë vjen aktiviteti bar-restorante me indeksin në rritje prej 11,9%, ndërsa në vend të tretë transporti, magazinimi e posta me rritje prej 11,6%.
Rritje të indeksit të shitjeve neto ka pasur gjithashtu e në këto zëra: pasuritë e paluajtshme (11,3%), agjenci udhëtimi (7,4%), hotele (5,7%), aktivitetet ligjore dhe kontabiliteti (4,9%), tregti me shumicë, pakicë dhe riparimi i automjeteve dhe motoçikletave (3,8%).
Ulje të indeksit të shitjeve neto pati vetëm në aktivitetin informacion dhe komunikacion, prej 2,1%.
Indeksi i punësimit
Indeksi më i madh i punësimit për tremujorin e parë të këtij viti është shënuar në aktivitetin hotele, me 8,8%. Së dyti në radhë vijnë pasuritë e paluajtshme me një rritje prej 6,6% dhe së treti në agjencitë e udhëtimit me një rritje prej 3,9%.
Rritje të indeksit të punësimit ka pasur gjithashtu dhe në këto aktivitete: tregti me shumicë e pakicë dhe riparimi i automjeteve dhe motoçikletave (3,4%), bar-restorante (2,6%), transport, magazinim dhe postë (2,4%), arkitekturë dhe inxhinieri (2,0%), aktivitetet ligjore dhe kontabiliteti (1,9%), informacion dhe komunikacion (1,5), dhe administrim zyrash, mbështetje administrative (1,0%).
Ulje të indeksit të punësimit është shënuar vetëm në sektorin e sigurimit dhe hetimit, me 1,3%.
Indeksi i pagave
Rritja më e lartë në indeksin e pagave për tremujorin e parë të vitit 2025, krahasuar me të njëjtën periudhë të një viti më parë, është shënuar në hotele dhe pasuritë e paluajtshme prej 26,2% secila. Në vend të dytë vjen tregtia me shumicë e pakicë dhe riparimi i automjeteve dhe motoçikletave me rritjen prej 22,1% dhe në vend të tretë vjen transporti, magazinimi dhe posta me rritjen prej 14,9%.
Janë shënuar gjithashtu rritje dhe në këto zë të ekonomisë: agjenci udhëtimi (13,8%), bar-restorante (12,4%), aktivitetet ligjore dhe kontabilitetit (10,6%), informacion dhe komunikacion (10,3%), arkitekturë dhe inxhinieri (9,8%), administrim zyrash, mbështetje administrative (7,1%), aktivitetet e sigurimit dhe hetimit (2,5%).
Vihet re se në indeksin e pagave, nuk ka asnjë ulje për aktivitetet e reja të ekonomisë vendase, por vetëm rritje.
