Një ngjarje e rëndë ka ndodhur mëngjesin e sotëm në një shkollë fillore në Beograd, ku si pasojë e sulmit me armë zjarri ka mbetur i vrarë një roje.
Bëhet me dije se ngjarja ka ndodhur në shkollën fillore “Vladislav Ribnikar” në Vraçar të Beogradit, rreth orës 8:00 ku ka pasur të shtëna me armë zjarri, kur njëri nga nxënësit ka qëlluar disa herë në drejtim të shokëve të klasës dhe personelit të sigurisë.
Sipas informacioneve të para nga mediat serbe, ka mbetur i vrarë roja i shkollës si dhe është plagosur rëndë mësuesja e historisë dhe ka disa nxënës të lënduar të tjerë.
Nxënësit e tjerë janë evakuuar dhe shumica e fëmijëve ndodhen jashtë të cilët po kontaktojnë me prindërit e tyre përmes telefonit.
Policia ka arrestuar të miturin e dyshuar, nxënës i klasës së shtatë, i cili siç dyshohet ka qëlluar disa herë me armën e babait të tij.
Siç mësohet jozyrtarisht, fëmijët fillimisht kanë menduar se dikush ka hedhur fishekzjarre dhe sipas pretendimeve të nxënësve të pranishëm, autori i ngjarjes i identifikuar si K.K. që qëlloi kurrë nuk kishte problem me askënd.
Nxënësit thonë se ka qenë i qetë dhe i tërhequr dhe se pesë minuta para përfundimit të orës së mësimit ka hyrë dhe ka nisur të qëllojë./kosovapress
