Barcelona do të jetë pa Aleix Vidal, për pjesën e mbetur të sezonit, pas një dëmtimi të tmerrshëm të pësuar në kaviljen e djathtë, në minutat e fundit të fitores 6-0 ndaj Alaves. Lajmi i mirë për ish-mbrojtësin e Sevilla është se nuk ka thyer asgjë, megjithatë këputja e ligamentit do të kërkojë deri në 5 muaj riaftësim. Vidal po kalonte momentin më të mirë të formës, që kur ka shkuar te Barcelona dhe faktikisht ndeshja e tij ndaj Alaves ishte më e mira në absolut.
Kur kishin mbetur edhe tre minuta lojë, Aleix Vidal u përplas në një duel me mbrojtësin e Alaves, Theo Hernandez, në luftë për topin dhe mbrojtësi i Barcelonës ishte ai që e pësoi më keq. Që në fillim u kuptua se dëmtimi i tij ishte i rëndë dhe skaneri i bëri konfirmoi se lojtari nuk ka thyer kaviljen, por do të operohet për të ngjitur ligamentet. “Unë e pashë nga pranë përplasjen dhe dëmtimin dhe skena ishte e tmerrshme. I uroj shërim të shpejtë Vidal. E mirëpresim.” – tha mesfushori i Barcelonës, Ivan Rakitic.
Futbollisti u çua në spitalin “San Jose de Vitoria”, menjëherë pas ndeshjes, ndërsa trajneri Luis Enrique deklaroi:“E kuptuam menjëherë se nuk ishte një dëmtim si gjithë të tjerat. Uroj të kthehet sa më shpejt. Ishte një ngjarje e hidhur për të dhe për Barcelonën.” Futbollistët në fushën e lojës dhe tifozët në stadiumin “Mendizorroza” duartrokitën momentin kur Vidal u largua nga fusha me barelë. Ai nuk do të luajë më për gjithë pjesën e mbetur të sezonit.
