Në qytetin e Pogradecit mbrëmjen e sotme janë mbajtur homazhe për Egli Progën, të riun që u vra pak ditë më parë në këtë qytet.
Homazhet u zhvilluan në vendin e ngjarjes, me pjesëmarrjen e qytetarëve, por edhe të familjarëve të 42-vjeçarit.
Në mesin e tyre ishin edhe babai dhe motra e viktimës.
Në një prononcim të shkurtër për mediat, babai i 42-vjeçarit shprehet se kërkojnë vetëm drejtësi.
“Vetëm drejtësi, vetëm drejtësi! Të dali e vërteta, kaq”, shprehet babai i Egli Proges.
Edhe motra e Egli Progës ka folur për mediat, ku u shpreh se kërkon drejtësi dhe se këtë betejë do ta çojë deri në fund.
“I ka mbyllur gojën këtij qyteti dhe vëllait tim i mbyllën jetën, do të shkojnë në burg të gjithë, pa asnjë përjashtim, si ata plehra që e dhunuan dhe ia morën shpirtin këtu, si ata të pashpirtët që kërkuan ta mbyllin këtë vrasje makabre me heshtje apo me letra. Kam vetëm një kërkesë për ata që më dëgjojnë sot, për pogradecarët, flisni, mos kini frikë! Tregoni të vërtetat tuaja për banditët që i morën jetën Eglit, dëshmoni sepse ata mund t’iu vrasin vëllezërit tuaj nëse shpëtojnë paq, tregoni kush i mbron, kush janë kriminelët pas tyre!
Kërkoj nga sistemi i drejtësisë, avokatë, prokurorë, gjyqtarë, këtë herë nuk ka para, nuk ka miq, nuk ka ndërhyrje dhe taraf. Mos bëni gabimin ta godisni me shkelma e grushte vëllanë tim, siç bënë barbarët që do të përpiqen t’iu blejnë. Kërkoj drejtësi. Duke filluar nga sot, i bëj thirrje avokatëve dhe juristëve të Shqipërisë të vijnë të mbrojnë Eglin bashkë me mua”, u shpreh motra e Egli Progës.
