Koalicioni i kryeministrit holandez Mark Rutte ka humbur mazhorancën në Senat pas zgjedhjeve rajonale që u mbajtën të mërkurën. Sipas rezultateve të exit-poll që dha televizioni publik NOS, në këto zgjedhje një numër i madh votash kanë shkuar për populistët dhe euroskeptikët.
Sipas exit-poll, formacioni politik i ekstremit të djathtë i drejtuar nga populisti Thierry Baudet, “Forumi për Demokracinë”, ka arritur të hyjë në Senat duke u bërë partia e dytë me më shumë mandate. Në këtë pikë, koalicioni i kryeministrit Rutte duhet të mbështetet në parti të tjera për të marrë vendimet dhe për të miratuar ligjet.
Sipas analistëve politikë holandezë, një ndikim shumë të madh në këto zgjedhje ka pasur vrasja e tre personave në Utrecht pak ditë më parë, duke i dhënë zë tezave të Baudet kundër emigrantëve.
Thierry Baudet njihet për deklaratat e tij kontroverse, mbi të gjitha për emigracionin dhe barazinë mes grave dhe burrave. Një prej deklaratave të tij publike është se “në përgjithësi, gratë janë më pak të afta dhe më pak ambicioze se burrat”. Partia e tij ishte prezente në Dhomën e Deputetëve, por jo në Senat. Nga këto zgjedhje rajonale, Baudet doli fituesi më i madh me 10 mandate në Senat, dy më pak se partia e kryeministrit Rutte./Opinion.al
