Aktualisht në Evropë gjenden 60 deri në 80 militantë të Shtetit Islamik, të vendosur në shtete të ndryshme e të gatshëm të kryejnë sulme terroriste.
Alarmi vjen nga shefi i anti-terrorizmit holandez, Dick Schoof, i cili u referohet të dhënave të klasifikuara të inteligjencës së Holandës. Celulave evropiane terroriste u vijnë mesazhe nga ISIS, që i udhëzon të mos udhëtojnë për në Siri apo Irak, por të përgatisin atentate në Evropë, thotë shefi i anti-terrorit. Në këtë kontekst numri i luftëtarëve të huaj nuk është rritur, por nga ana tjetër kërcënimi mbetet i lartë.
Shembulli konkret i alarmit të zyrtarit të lartë holandez vjen nga Spanja, ku policia arrestoi këtë të shtunë 2 marokenë, përkrahës të ISIS, të dyshuar se do të kryenin sulme terroriste në Madrid dhe Barcelonë, raporton klan.
Siç raportojnë autoritetet vendase dy të arrestuarit ishin mjaft aktivë edhe në rrjetet sociale, ku propagandonin dhe rekrutonin militantë islamistë në celulën e tyre.
Spanja është një nga vendet ku alarmi terrorist është i lartë. Që prej vitit 2015 kur autoritetet ngritën nivelin e sigurisë janë arrestuar më shumë se 160 persona të dyshuar për lidhje me terrorizmin.
