Përballja Shqipëri-Spanjë, mbrëmjen e sotme në Loro Boriçi, është ndeshja e gjashtë në historinë e sfidave mes tyre.
Pesë ndeshjet e para janë zhvilluar në periudhën 1986-1993 dhe të gjitha kanë përfunduar me fitoret e iberikëve.
Përballja e fundit mes këtyre dy skuadrave ka qenë ajo e 22 shtatorit të vitit 1993, një sfidë kjo që rezulton se është tentuar të manipulohet.
Në atë kohë, një ndërmjetës spanjoll që fluturoi me avion “charter” së bashku me skuadrën përfaqësueses i ofroi Federatës Spanjolle të Futbollit mundësinë për ta manipuluar këtë përballje, një teori kjo që është mohuar nga Anhel Maria Vijar. Sfida përfundoi 5-1 për skuadrën e Spanjës që në atë kohë drejtohej nga Javier Clemente. Salinas 3 herë, Toni dhe Caminero, shënuan për Spanjën, ndërkohë që për kuqezinjtë golin e vetëm e shënoi Sokol Kushta.
Historia e përballjeve mes kombëtares shqiptare dhe Spanjës nisi në vitin 1986 me sfidën e eliminatoreve të Euro 1988. Ndeshja e parë përfundoi 2-1 për skuadrën e Spanjës me gola të Arteçes dhe Hoakin. Sfida e kthimit u luajt në Sevija me iberikët që fituan thellë 5-0 falë 3 golave të Bakeros, Miçel e Pako Jorentes.
Pas 3 vitesh, në 1991 Kombëtarja shqiptare dhe Spanja panë që t’u kryeqëzoheshin sërish rrugët. Përballja ishte për eliminatoret e Europianit 1992 dhe sfida e parë u luajt në Sevija, ku kombëtarja shqiptare shënoi humbjen më të thellë në përballjet ndaj iberikëve, 9-0.
Butragenjo 4 herë, Karlos 2 herë, Amor, Hierro e Bakero ishin ata që ndëshkuan përfaqësuesen tonë. Në 22 prill të 1992, Spanja shënoi një tjetër sukses ndaj kombëtares sonë, por këtë radhë me rezultatin 3-0 falë dygolëshit të Miçel dhe atij të Hierros.
