Detaje të reja kanë dalë sa i përket vrasjes së biznesmenit 39-vjeçar Shpëtim Shala, rreth orës 15:00 të ditës së diel në zonën e plazhit në Durrës. Ai është qëlluar me 6 plumba në kokë, me një pistoletë automatike që dyshohet se ka qenë më silenciator.
Ai është qëlluar nga afër, ndërsa ishte në makinën e tij e llojit “Golf 5” me targa AA 086 HJ. Shala është gjetur i pajetë në mjetin e tij nga qytetarë. Pavarësisht se deri tani janë shoqëruar 15 persona, nuk ka asnjë të dyshuar për vrasjen.
Burime nga policia kanë thënë se vrasësi dyshohet të jetë profesionist, referuar edhe rrethanave të ngjarjes. Por 39-vjeçari, babi i tre vajzave nuk është një emër i panjohur për policinë e qytetit bregdetar. I njohur për disa biznese, ai i ka shpëtuar burgut në vitin 2015, i akuzuar për trafik drogë. Tv Klan disponon vendimin e Gjykatës së Lartë, ku Shala është shpallur i pafajshëm.
Ngjarja
Në 17 mars në vitit 2011 policia e Durrësit kryen një kontroll tek një bilardo, në pronësi të Shpëtim Shalës, në lagjen 13, në zonën e plazhit. Në këtë lokal ishte i punësuar edhe Gentian Tila. Pas kontrollit, sipër banakut të lokalit është gjetur një çantë sporti me 5 qese farmaceutike dhe në pjesën fundore të banakut 9 qese të tjera me kanabis. Në ato momente ka qenë vetëm Gentian Tila i pranishëm, i cili është arrestuar. Ai ka akuzuar pronarin (Shpëtim Shalën) për lëndën narkotike, i cili më pas është arrestuar. Por pas ballafaqimit të tyre, Shala është mbrojtur se nuk kishte dijeni për lëndën narkotike, duke thënë se në lokal mund të futet çdo kush. Dhe në mungesë të provave, pas dt rekurseve nga ana e prokurorisë, Shala është shpallur i pafajshëm, ndërsa Gentian Tila është dënuar me gjobë prej 140 mijë lekë. /tvklan.al
