Kishte një vit që e përndiqte vazhdimisht. Një djalë 23 vjeçar ka rënë në prangat e policisë, pasi persekutonte prej kohës një vajzë 10 vite më të madhe se vetja.
Të cilën jo vetëm e ka përndjekur por edhe e ka kërcënuar edhe me thikë.
Policia e Tiranës bën me dije se ka vënë në pranga shtetasin Alban Hadëri, i cili në momentin e arrestimit u kap në flagrancë në rrugën “Mine Peza”, ndërsa kërcënonte 33 vjeçaren me iniciale A.K.
Shkak për këtë kërcënim janë bërë refuzimet e vazhdueshme të vajzës.
Vajza ka kërkuar ndihmën e policisë dhe ka qenë një patrullë e Komisariatit Nr.3 që i është përgjigjur kërkesës për ndihmë, duke arrestuar në flagrancë 23 vjeçarin.
Kur ka parë patrullën e Policisë, Hadëri e ka hedhur thikën në tokë, duke tentuar të largohet me vrap nga vendngjarja, por është ndaluar pak hapa më tej
nga Policia. Burimet thanë se vajza ka bërë edhe kallëzim me shkrim për ngjarjen, duke treguar rrethanat dhe motivet.
DENONCIMI
Sipas deklarimeve që 33 vjeçarja A.K. ka dhënë në Polici, shtetasi Alban Hadëri e përndjek prej rreth një viti. Në mënyrë të vazhdueshme e ka shqetësuar me mesazhe në rrjetet sociale dhe në celular, duke i kërkuar që të bëhej e dashura e tij. Por gjithmonë është refuzuar nga vajza dhe për këtë arsye ditën e fundit ai kishte nisur t’i dërgonte edhe mesazhe kërcënuese. Vajza ka shpjeguar në Polici se nuk e kishte denoncuar më parë ngjarjen, duke qenë se nuk i kishte marrë seriozisht kërcënimet e tij, edhe për shkak se Hadëri ishte në një moshë të re. Por nga ana tjetër, ka treguar edhe se nuk u është përgjigjur asnjëherë mesazheve të tij, duke mos i dhënë arsye që ai ta bezdiste më. E megjithatë, përndjekja ka
vazhduar, madje duke i zënë pritë edhe te hyrja e pallatit ku ajo banon, në rrugën “Mine Peza”, në Tiranë. Edhe mbrëmjen e së premtes ka ndodhur e njëjta situatë. Vajza ka qenë duke u kthyer në shtëpi, kur te hyrja e pallatit është përballur me të dyshuarin Alban Hadëri. Kësaj radhe, kërcënimet e tij nuk ishin më vetëm me fjalë, por ai i drejtoi edhe thikën 33vjeçares, e cila e frikësuar nisi të bërtiste duke kërkuar ndihmë./ Etleva Delia Panorama.al
