Ju kujtohet Genny, “një kopil”? Kapo i ultrasve të Napolit u ngjit në piedestalin e kronikës dhe të nderimeve, pasi ditën e finales së Kupës së Italisë, në vitin 2014, mes Napolit dhe Fiorentinës, u bë protagonist i tratativave me Policinë në stadiumin “Olimpico”, vetëm pak pas shkëmbimit të zjarrit në “Tor di Quinto”, që i kushtoi jetën një tifozi të ri të Napolit, Ciro Esposito. Krejt ndryshe, sot, Gennaro De Tommaso, emri i vërtetë i kapos së ultrasve napoletanë, u dënua me 10 vjet burg për lidhje me krimin e organizuar dhe trafikim ndërkombëtar droge.
Vendimi u dha nga trupi gjykues në përfundim të një procesi të përshpejtuar, në të cilin prokuroria kishte kërkuar 18 vjet burg për kapon e ultrasve të Napolit. Genny “një kopil” u shpall fajtor për shpërndarje të hashashit, marijuanës dhe kokainës, me prejardhje nga Holanda dhe Spanja, në bashkëpunim me dy xhaxhallarët e tij, Gaetano dhe Giuseppe, si dhe dy kushërinjtë e tij. Ultrasi i Napolit tashmë gjendet në arrest shtëpie, teksa avokatja e tij, Giovanna Castellano u shfaq e kënaqur me vendimin e gjykatës.
