Një i mitur shqiptar ka ngjallur vëmendje nga ana e autoriteteve italiane për historinë e tij në skamje dhe ikjen nga Shqipëria drejt shtetit fqinj natën e Krishtlindjeve.
Bëhet fjalë për një 16-vjeçar shqiptar që la familjen e tij në kushte të vështira ekonomike për një jetë më të mirë në Itali.
Ai u nis me traget nga Shqipëria drejt Italisë natën e Krishtlindjeve dhe zbriti në Bari.
Shqiptari i mitur nuk kishte asgjë me vete, veçse pasaportën.
I veshur hollë dhe pa asnjë të hollë në xhep, ai përshkoi kilometra të tëra nga Bari drejt Monzës, duke fjetur nëpër stacione hekurudhash dhe duke u ushqyer me ç’të gjente nëpër mbeturina.
Pas ditësh ecje në mëshirë të fatit, shqiptari hyri në Komisariatin e Policisë në Monza dhe kërkoi ndihmë.
Agjentët e Policisë, Ivano Bassani dhe Maria Paola Spatari ishin të parët që ranë në kontakt me shqiptarit.
Madje, i mituri, emri i të cilit nuk bëhet i ditur nuk dinte asnjë fjalë italisht dhe komunikimi me të është bërë përmes “google translate”
Ai mbërriti në komisariat i uritur dhe i veshur hollë ndërkohë që temperaturat ishin të ulëta.
Minoreni kishte vetëm një bluzë me mëngë të shkurtra, pantallona dhe një palë këpucë të vjetra, ndërsa në dorë mbante shtrënguar pasaportën.
Agjentët e Policisë, pasi i dhanë ndihmën e parë e kanë dërguar në qendrën e kujdesit për të miturit në Monza.
Nuk dihet ende nëse shqiptari do të dëbohet në Shqipëri, apo do t’i jepet një shans për të nisur një jetë të re në Itali. / Panorama.com
