Kanë kaluar 7 muaj që nga aksidenti i 30 korrikut të 2015-ës, që përmbysi jetën e atletes austriake Kira Grunberg. Atletja kampione e Austrisë në garën e kërcimit me shkop u rrëzua gjatë stërvitjes, duke u paralizuar. Por dje, pas 7 muajsh në spital, ajo ka dalë nga klinika e rehabilitimit dhe është rikthyer në shtëpi. Natyrisht duke përdorur një karrocë. “Jam e lumtur që mund të kaloj ditët me familjen time, të jem në një tavolinë me njerëzit e mi, të gatuaj apo bëj diçka tjetër”, tha atletja 22-vjeçare, që është njëkohësisht edhe rekordmeve e vendit të saj në garën e kërcimit me shkop (4.45 metra).
Edhe pse kanë kaluar 7 muaj nga aksidenti në stërvitje ende nuk ka një diagnozë përfundimatare për Kira Grunberg, që i lëviz gishtat me vështirësi dhe nuk e ka ende kontrollin e gjithë gjymtyrëve. Por mjekët japin sinjale pozitive për të ardhmen: “Kira do të jetë në gjendje t’i japë makinës një ditë”. Edhe vetë atletja nuk tërhiqet dhe shprehet se ka dëshirë të japë leksione në universitet, pasi e kupton që e ka të pamundur të merret sërish me sport. Për momentin ajo lëviz me karrocë dhe veprimet e saj janë të limituara, por ky është një sinjal pozitiv, pasi atletja mund të paralizohej plotësisht.
