Gjykata e Tiranës ka përfunduar gjykimin e një dosjeje të pazakontë, ku një 46 vjeçar i divorcuar akuzohej për ngacmimin seksual dhe përndjekjen e një 21 vjeçari.
Historia ka zënë fill në dhjetor të vitit 2014, kur M. C. ka pranuar një ftesë për miqësi në Facebook nga një profil i pavërtetë në dukje. Janë dashur disa muaj, pasi kishin shkëmbyer biseda në Facebook, apo edhe komete “këtu ke dalë bukur” apo “buzët i ke të bukura” në fotot e të riut, që ai të mësonte se personi me të cilin fliste ishte një 46 vjeçar, shkruan Panorama.
Gati katër muaj më vonë, ata janë takuar disa herë, për kafe, apo dreka, ku gjatë shoqërimit për në shtëpi 46 vjeçari ka tentuar ta prekë në vende intime të riun. Sipas kallëzimit të M. C., i pandehuri Arben G. i ka kërkuar të kryejnë marrëdhënie seksuale.
Refuzimi i të riut nuk është pritur mirë nga i pandehuri, i cili e ka ndjekur atë për ditë me radhë, ka tentuar t’i futet në banesë, apo edhe e ka kërcënuar përmes adresave anonime në Facebook.
Pas kallëzimit të parë të të riut, 46 vjeçari është lënë në “arrest shtëpie”, por ai e ka thyer të paktën tri herë këtë masë sigurie, duke përndjekur të riun. Më 27 qershor 2016, i pandehuri Arben G. u deklarua fajtor nga Gjykata e Tiranës për kryerjen e tri veprave penale: “ngacmim seksual”. Ai u dënua me 1 vit e 6 muaj heqje lirie.
Gjatë gjykimit, i pandehuri ka mohuar ta ketë ngacmuar seksualisht të riun apo ta ketë përndjekur me argumentin se “ai nuk ka të tilla preferenca”.
