Sine Koldashi, nga Laknasi i Tiranës, po rrit e vetme, në kushte shumë të vështira, 5 fëmijët e saj prej dy vitesh. Fëmijët e moshave nga 13 deri në 3 vjeç, rriten vetëm nga nëna e tyre, pasi babai i tyre po vuan dënimin me burg nën akuzën e dhunës në familje.
37-vjeçarja është detyruar të kujdeset vetë për fëmijët e saj që prej dhjetorit të vitit 2017. Një natë bashkëshorti i saj u kthye i dehur në shtëpi dhe e goditi, teksa ajo ishte 5 muajshe shtatzënë. Gjatë goditjeve gruaja ra nga kati i dytë i banesës duke humbur menjëherë fëmijën. Babai i 5 fëmijëve e lë bashkëshorten të shtrirë në oborr dhe shkon përsëri në lokal.
” Varfëria në kulm. Kam 5 fëmijë. Jam e vetme, burrin në burg. Nuk kanë ku të hanë.Bashkëshorti është në burg pasi unë isha shtatzanë pas 5 fëmijëve, ai erdhi i dehur, më gjuajti dhe unë e humba fëmijën. Më gjuajti me grusht, unë rashë nga ballkoni dhe humba fëmijën. Djali 11 vjeç ka marrë në telefon policinë dhe u ka thënë mami më ka vdek, bebi më ka vdek.E kanë marrë burrin tek lokali policia dhe e kanë çuar në burg. Është dënuar 3 vjet e 6 muaj”.
Djali 9-vjeçar pasi pa nënën të mbuluar me gjak, lajmëroi policinë, duke i shpëtuar jetën nënës së tij. Por Sinja duket e frikësuar për jetën e të birit, pasi bashkëshorti të lirohet.
“Kam frikën e djalit se mos ma vret djalin. Djali e futi në burg. Por djali bëri veprimin më të mirë se më shpëtoi jetën, po të mos vinte policia do të vdisja në oborr”.
Për të siguruar ushqim për fëmijët shpesh Sinja detyrohet të punojë. Në ditë kur gjen punë, ajo ka pengun e djalit 3 vjeçar, të cilin pasi e lidh në djep e lë vetëm në shtëpi. Vogëlushi qëndron i lidhur në djep derisa vinë fëmijët e tjerë nga shkolla.
Ndonëse shpesh të paushqyer, fëmijët janë me rezultate të shkëlqyera në mësime.
