Panorama e zymtë që krijoi tërmeti që shkaktoi 50 viktima dhe la qindra të plagosur shkaktoi një reagim të jashtëzakonshëm të ndihmave jo vetëm nga qytetarët brenda vendit por edhe nga jashtë.
Qytetarët, bizneset dhe vende të ndryshme janë solidarizuar menjëherë duke dërguar ndihma dhe për ta bërë këtë më të lehtë, Drejtoria e Përgjithshme e Doganave që nga sot ka hequr tarifën e skanimit për çdo mjet që sjell ndihma humanitare për të prekurit nga tërmeti.
“DPD në bashkëpunim me kompaninë S2 Albania, ka mundësuar nga sot në sistem mospagimin e kësaj tarife për këtë kategori mjetesh, që sjellin ndihma humanitare për një afat 30 ditor. Kjo nismë u ndërmor në shenjë solidariteti me gjithë të prekurit nga tërmeti”, thuhet në njoftimin e DPD.
Kryeministri Rama njoftoi gjithashtu sot në mbledhjen e qeverisë se do të përjashtohen nga tatimi mbi fitimin të gjitha objektet të cilat do të përdoren për rindërtimin e banesave të dëmtuara nga tërmeti. /Opinion.al
