Gjykata e Vlorës ka pezulluar nga detyra drejtorin e Albpetrolit, Endri Puka. Vendimi është marrë në datën 2 qershor 2017 dhe firmosur nga gjyqtari Albert Spiro, pas një kërkese të paraqitur nga prokuroria, e cila po e heton Endri Pukën për shpërdorim detyre me pasoja të rënda financiare.
Ndonëse gjykatësi ka firmosur vendimin për pezullimin e Pukës më datën 2, ministri i Energjisë nuk ka marrë masa për shkarkimin e tij nga detyra, raporton portali Syri.net.
Endri Puka po hetohet nga organi i akuzës në lidhje me shkeljen e disa kontratave koncesionare në mënyrë arbitrare, duke sjellë barrë për financat shtetërore por dhe me pasojë ndotjen e mjedisit.
Endri Puka u emërua në këtë post në vitin 2013 si një sugjerim i deputetit Koço Kokëdhima, por prej afro një viti ai ka besimin direkt të kryeministrit Rama dhe ministrit Gjiknuri dhe punon ngushtësisht vetëm me ta. Ai është i angazhuar indirekt në fushaten e PS-së në zonën e Delvinës.
