Vajza 20-vjeçare, M.Gjonaj, ka lidhur me natriban dhe ka qëlluar katër herë me thikë në trup të riun Severjan Tusha, të cilin e akuzon për tentativë përdhunimi.
Prokuroria e Lezhës ka dyshime se motiv i ngjarjes ka qenë “ftohja” e marrëdhënies mes dy të rinjve. Në mënyrë jozyrtare dhe ende të bazuar mbi të dhëna paraprake, grupi i hetimit ka dyshime se e akuzuara M.Gjonaj dhe i dyshuari Severjan Tusha ishin njohur muajin e fundit.
Hetuesit dyshojnë se kohët e fundit i riu nuk kishte shfaqur interes, duke kërkuar të shkëpuste komunikimin me 20 vjeçaren M.Gjonaj, e cila katër ditë më parë i ka kërkuar të takoheshin “për një sqarim”.
Në këtë mënyrë, dyshohet se e reja ka shkuar e përgatitur në këtë takim, pasi ka marrë me vete thikën dhe natribanin ngjitës me të cilin ka lidhur të dëmtuarin.
Gjykata ka zhvilluar dje seancën për caktimin e masave të sigurisë ndaj vajzës dhe djalit të akuzuar për ngjarjen e ndodhur katër ditë më parë në Kodër Rrëshen.
Prokuroria kërkoi masën arrest me burg për 20 vjeçaren M.Gjonaj, e cila nga hetimet rezulton se e ka lidhur me natriban Severjan Tushën e më pas e ka qëlluar katër herë me thikë.
Për këtë arsye, Prokuroria tha se shtetasja M.Gjonaj akuzohet për veprën penale “vrasje e mbetur në tentativë”. Kjo akuzë është ngritur ndaj saj për shkak të katër plagëve të rënda që ka pësuar shtetasi Severjan Tusha, i cili është akoma në spital në gjendje të rëndë.
HETIMI
Nga ana tjetër, Gjykata ka vendosur dje masën e sigurisë “detyrim paraqitje” ndaj të riut që akuzohet nga vajza për tentativë përdhunimi. “Masa e sigurisë për shtetasin Severjan Tusha është vendosur për akuzën marrëdhënie seksuale me të rritur e mbetur në tentativë”, thanë burimet e Prokurorisë.
Sipas tyre, kjo akuzë dhe masa e sigurisë janë vendosur ndaj të riut bazuar në dëshminë që ka dhënë e akuzuara tjetër e ngjarjes, M.Gjonaj. “Ajo ka pretenduar se Severjan Tusha ka tentuar ta përdhunojë, ndonëse nga këqyrja që është bërë, vajza nuk ka asnjë shenjë dhune në trup”, kanë thënë burimet e Prokurorisë.
Sipas tyre, dëshmia e të resë është ende e pakonfirmuar dhe e pambështetur në të dhëna të tjera. Vajza nuk ka qenë në gjendje të shpjegojë “takimin në mal” me Severjan Tushën, ndonëse gjatë marrjes në pyetje ka pretenduar se nuk e njihte dhe se nuk kishte lënë asnjë takim me të.
Ngjarja
Katër ditë më parë, Policia e Mirditës arrestoi të riun Severjan Tusha dhe shtetasen M.Gjonaj.
Ata u akuzuan në lidhje me ngjarjen e ndodhur në Kodër Rrëshen, ku një 20vjeçare plagosi rëndë me thikë një të ri, i cili, sipas saj, tentoi ta përdhunonte.
Dyshohet se dy të rinjtë kishin komunikuar në telefon mes tyre, prej gati 1 muaji, dhe kishin lënë takim.
Vajza dyshohet se ka marrë thikën dhe natribanin me vete ndërsa kishte udhëtuar nga fshati Prosek, ku jetonte me prindërit e saj, deri në Kodër Rrëshen, për t’u takuar me 24vjeçarin Severjan Tusha.
Ky i fundit e ka pritur vajzën në fshatin e tij, për t’u takuar në një zonë të pyllëzuar, 1 km larg banesës së tij.
