Duke mos u treguar i qartë, kryetari i PD, Sali Berisha tha se opozita do të nisë betejën finale me kryeministrin Edi Rama, deri në largimin e tij.
Nga selia blu, tha se do të përdoret çdo mjet i mosbindjes civile, dhe se Rama nuk ka asnjë tjetër alternativë, veç se të largohet nga qeveria.
“Demokratet dhe demokratë, janë momentet më solemne, më kritike, më të rëndësishme të jetës tuaj politike. E ardhmja e PD-së, e demokracisë shqiptare do të përcaktohet nga suksesi i betejës kundër kësaj kalbësire të pashembullt, që angazhoi në shkelmim më të paimagjinueshëm, flagrant, parimi dhe interesi të Shqipërisë dhe shqiptarëve, agjenturën, mafian ruse për shkatërrimin e pluralizmit dhe demokracisë në Shqipëri. Ne pra hymë tani në finale. Çdo luftë ka betejën finale dhe kjo që do të nisim është beteja finale në të cilën ju siguroj se ne do të fitojmë. Edhe njëherë i kërkoj Edi Ramës në mënyrë të prerë; largohu menjëherë nga pushteti. Jep dorëheqjen se alternativë tjetër nuk ka për ty. Edhe tanket Putin të vijnë në Tiranë, nuk të mbajnë në pushtet, largohu menjëherë. Edhe njëherë, demokratë dhe demokrate, ora është e jona, e një beteje që në do ta bëjmë me vendosmëri, guxim dhe përkushtim si asnjëherë tjetër më parë”,-tha Berisha.
PD thotë se kreu i qeverisë është i përfshirë në afera korruptive së bashku me izh-zyrtarin e FBI, McGonigal, i cili po hetohet në SHBA./Opinion.al
