TaskForca e Prokurorisë së Tiranës sekuestron të gjitha praktikat e Drejtorisë së Tatimeve të firmosura vitin e fundit nga Androkli Kokthi, i arrestuar pak ditë më parë me akuzën “shpërdorim detyre”.
Vendimi është marrë në kuadër të hetimeve që po kryen Prokuroria për akuzën shpërdorim detyre ndaj drejtorit të Drejtorisë Rajonale të Tatimeve në Tiranë, Androkli Kokthi. Prokuroria ka theksuar se ka dyshime për abuzime nga ishdrejtori edhe në raste të tjera, sikurse ka ndodhur në episodin për të cilin ai është arrestuar.
Androkli Kokthi akuzohet për një vendim kthim malli të sekuestruar një biznesi që nuk punonte me fatura tatimore. Prokuroria ka hedhur poshtë dje pretendimet e avokatëve dhe të vetë ishdrejtorit të Tatimeve se “është mbajtur në përgjim për tetë muaj”.
“I pandehuri i kësaj çështjeje nuk është përgjuar asnjë ditë. Personi i dyshuar për veprën penale të ‘shpërdorimit të detyrës’ është arrestuar në vijim të një hetimi të nisur në janar 2016, në bazë të referimit të Policisë së Shtetit”, tha Prokuroria.
Sipas burimeve nga organi i akuzës në kryeqytet, derisa hetimi ka nisur në janar 2016, është e qartë se nuk ka se si ishdrejtori të jetë përgjuar përgjatë tetë muajve.
Abuzimi me lirimin e mallit
Sipas Prokurorisë, i dyshuari Androkli Kokthi, në kundërshtim me ligjin, ka urdhëruar kthimin e mallit të konfiskuar një subjekti tregtar privat, që ushtron veprimtarinë në shitblerjen e pjesëve të këmbimit të automjeteve.
Në muajin mars 2015, nga ana e inspektorëve të Kontrollit Tatimor Tiranë, është konstatuar se një subjektin “L..B…” gjendej një sasi malli pa faturë, në vlerë totale prej rreth 4 milionë lekësh të rinj.
Pas konstatimit në fjalë, vetë drejtoria e Kokthit, bazuar në procedurat ligjore, ka njoftuar TaskForcën e hetimit tatimor, e cila ka vendosur që mallin e konstatuar pa faturë ta konfiskojë. Konfiskimi është nga Drejtoria e Hetimit Tatimor në Drejtorinë e Përgjithshme të Tatimeve.
Malli i konfiskuar është dërguar për ruajtje në magazinat e Rezervave të Shtetit. Nga këqyrja në protokollin e Drejtorisë Tatimore Tiranë del se, javë më pas, gruaja e pronarit të biznesit që i ishte bllokuar malli, ka bërë një ankesë.
MISTERI I ANKESËS
Kjo ankesë nuk është gjetur ende dhe dyshohet se shënimi në protokoll në lidhje me këtë dokument ka pikëpyetje të mëdha. Me të njëjtin numër protokolli, por duke i shtuar një fraksion, është lëshuar më pas edhe urdhri i firmosur nga Androkli Kokthi për kthimin te biznesi në fjalë të mallit të sekuestruar pa faturë.
“Disa kohë pas konfiskimit të mallit, nëpërmjet një shkrese, drejtori rajonal i Tatimeve Tiranë urdhëron lirimin nga konfiskimi të mallit dhe kthimin e tij subjektit privat që i ishte gjetur malli pa faturë”, ka thënë Prokuroria.
Sipas saj, ky veprim është tërësisht në kundërshtim me ligjin, pasi malli i konfiskuar nuk mund të rikthehet, por vetëm mund të blihet nga subjekti, të cilit i është gjetur pa faturë.
Po ashtu, në bazë të procedurave administrative dhe atyre tatimore, një urdhër administrativ i nxjerrë nga një organ më i lartë, nuk mund të shfuqizohet nga një organ më i ulët. Dëmi ekonomik i shtetit në këtë rast llogaritet se ka qenë 4 milionë lekë, që duhej të kalonin në arkën e Tatimeve./Panorama.al
