Kryeministri i Kosovës, Albin Kurti deklaroi sot se tarifa 100% ndaj mallrave serbe do të hiqet duke filluar nga 15 marsi.
Këtë vendim të qeverisë së re të Kosovës e ka komentuar edhe ish-kryeministri Ramush Haradinaj.
“Sonte Albin Mashtruesi u dorëzua para Serbisë. Ky është fillimi i kthimit të Serbisë dhe Rusisë në Kosovë. Albin Mashtruesi nga sot je përgjegjës për ripushtimin ekonomik të Kosovës nga Serbia.
Zoti e bekoftë Kosovën dhe popullin e saj!”, shkruan Haradinaj.
Nga ana tjetër deputetët e opozitës në Kosovë kanë kërkuar seancë të jashtëzakonshme të Kuvendit për ta kundërshtuar heqjen e tarifës ndaj produkteve me origjinë nga Serbia dhe Bosnjë dhe Hercegovina.
Kërkesa e 41 deputetëve të partive opozitare, PDK-së, AAK-së dhe Nismës tashmë i është drejtuar Kryesisë së Kuvendit që pritet të mblidhet të premten.
Opozita ka kërkuar që seanca të mbahet gjatë javës së ardhshme.
Kurti u shpreh se pas këtij vendimi të Qeverisë së Kosovës ajo e Serbisë duhet të zotohet se do ta ndërpres fushatën për çnjohje ndaj Pavarësisë së Kosovës, dhe të nisë me eliminimin e barrierave tregtare jotarifore. /Opinion.al
