TIRANË- Gjykata Kushtetuese doli sot me një vendim për kërkesën e Partisë Demokratike lidhur me heqjen e mandatit të deputetit socialist Koço Kokëdhima. Në njoftimin për shtyp të kësaj gjykate thuhet se kërkesa është pranuar pjesërisht.
Gjykata Kushtetuese vendosi:
– Pranimin pjesërisht të kërkesës.
– Interpretimin e nenit 70/4 të Kushtetutës si vijon:
Në rast se Kuvendi i Shqipërisë vihet në lëvizje me mocion të kryetarit të Kuvendit ose një të dhjetës së anëtarëve të tij, në kuptim të pikës 3 të nenit 70 të Kushtetutës, ai duhet të vendosë dërgimin e çështjes në Gjykatën Kushtetuese, e cila është organi i vetëm që ka kompetencën të shqyrtojë në themel çështjen dhe të vendosë mbi papajtueshmërinë e mandatit të deputetit.
– Konstatimin si të papajtueshëm me Kushtetutën e Republikës së Shqipërisë të vendimit nr.48/2015 të Kuvendit të Shqipërisë “Për mosdërgimin në Gjykatën Kushtetuese të çështjes për konstatimin e papajtueshmërisë me detyrën e deputetit të zotit Koço Kokëdhima”.
– Ky vendim është përfundimtar, i formës së prerë.
