Ish – Kryetari i Bashkisë së Kukësit, Hasan Halili që ishte shpallur në kërkim nga policia, është vetëdorëzuar dhe më pas ka kërkuar ndihmë shëndetësore. Ai ka shkuar në orët e para të mëngjesit të sotëm në spital pas problemeve me zemrën. Halili po mbahet në ruajtje nga policia.
Prokuroria ka lëshuar një urdhër -arresti për të. Ish – Kryetari i Bashkisë së Kukësit akuzohet për shpërdorim detyre.
Halili në bashkëpunim me vartësit, Lekë Deda ish – Drejtor i Financave dhe Gëzim Ukperaj, ish – Drejtor i Borxhit në Bashkinë Kukës kanë krijuar një skemë fiktive, duke u regjistrua si aksionerë në klubin e futbollit të qytetit.
Në këtë skemë ka bashkëpunuar edhe Mirdash Hoxha, ish – Drejtor Rajonal i Tatimeve. Në formën e sponsorizimit, ata kanë marrë nga buxheti i Bashkisë 45 milionë lekë të reja, të cilat korespondojnë me periudhën 2011 – 2015.
Këtë shumë, Bashkia e Kukësit e ka siguruar duke mos paguar kontributet shoqërore dhe shëndetësore, për pjesën më të madhe të punonjësve në varësi të institucionit.
Nga verifikimet ka rezultuar se për periudhën 2011 – 2015, shumë punonjës kanë marrë pagën, por nuk figurojnë me kontribute të paguara.
Kallëzimi për këtë rast abuzimi është bërë nga admnistrata e Bashkisë aktuale, e cila kishte akumual borxhe të mëdha nga keqmenaxhimi.
