Administrata Trump është paditur nga Universiteti i Harvardit, për vendimin e presidentit të Shteteve të Bashkuara të Amerikës për t’i hequr këtij institucioni të drejtën për të pranuar studentë ndërkombëtarë.
Siç raporton Reuters, në një ankesë të dorëzuar në Gjykatën Federale të Bostonit, Harvardi e cilëson vendimin si një “shkelje flagrante” të Amendamentit të Parë të Kushtetutës së SHBA-ve dhe të ligjeve të tjera federale.
Universiteti thotë gjithashtu se ky vendim ka pasur një “efekt të menjëhershëm dhe shkatërrues” mbi institucionin dhe mbi më shumë se 7,000 studentë me viza.
Sipas Departamentit Amerikan të Sigurisë Kombëtare, vendimi i Trump do t’i detyrojë mbi 6,000 studentë ndërkombëtarë aktualë të transferohen në universitete të tjera ose të humbasin statusin e tyre ligjor në SHBA.
“Me një firmë, qeveria ka tentuar të fshijë një të katërtën e trupës studentore të Harvardit, studentë ndërkombëtarë që kontribuojnë ndjeshëm në universitet dhe në misionin e tij. Ky është veprimi më i fundit i qeverisë, si një hakmarrje e hapur ndaj Harvardit për ushtrimin e të drejtave të tij kushtetuese sipas Amendamentit të Parë, duke refuzuar kërkesat e qeverisë për të kontrolluar drejtimin, programin mësimor dhe ‘ideologjinë’ e stafit dhe studentëve të tij”, thuhet në ankesën e Harvardit.
Urdhrin për “dëbimin” dhe ndalimin e studentëve të huaj në Harvard e dha dje Sekretarja e Sigurisë Kombëtare, Kristi Noem. Ajo e akuzoi universitetin për “nxitje të dhunës, antisemitizëm dhe bashkëpunim me Partinë Komuniste Kineze”.
