Qeveria e Kosovës ka reaguar sot për vendimin e gjykatës franceze për të mbajtur edhe një muaj tjetër në izolim Ramush Haradinajn. Përmes një deklarate për mediat, Qeveria e Republikës së Kosovës deklarin se “shtyrja e sërishme e vendimit për ish-kryeministrin e Kosovës, Ramush Haradinaj, është dëshmi e keqpërdorimit të drejtësisë nga Serbia”. Sipas saj, në emër të informatave shtesë nga Serbia, po zvarritet një proces i ndërtuar mbi akuza të fabrikuara, që synojnë denegrimin e popullit të Kosovës.
“Përmes këtyre lojërave të ulëta, për përfitime të brendshme politike, Serbia, duke keqpërdorur drejtësinë, po përpiqet të dëmtoj po ashtu imazhin dhe personalitetin e ish–kryeministrit Ramush Haradinaj, të qytetarëve dhe shtetin e Kosovës. Besojmë se drejtësia franceze nuk do të tolerojë një gjendje të tillë”, thuhet në deklaratë.
