“Politika e Kosovës, veçanërisht e përfaqësuar prej qeverisë Kurti i ka ngul thikë pas shpine dy vlerave tona më sublime që i kemi.”
Kështu kryetari i Aleancës për Ardhmërinë e Kosovës, Ramush Haradinaj, kritikon kryeministrin Albin Kurti për sjelljet e tij ndaj aleatëve ndërkombëtarë, veçanërisht Shteteve të Bashkuara të Amerikës dhe veteranëve të dalë nga lufta e fundit e Ushtrisë Çlirimtare të Kosovës.
“Sjellja e Kurtit ndaj kësaj kategorie është jo njerëzore, jo kombëtare dhe jo institucionale.”
Përfaqësuesit e shoqatave të dala nga lufta patën këtë qëndrim në takimin me Haradinaj.
“Është prek keq, është prek rëndë dhe është thyer dinjiteti i secilit qytetarë dhe jo vetëm kësaj kategorie, ku dalin përgjimet dhe kërkohet nga ata që dje i kemi pas kundërshtuar që me dëmtu një kategori si veteranët e luftës së UÇK-së”, tha kryetari i shoqatës së Familjeve të Dëshmorëve të UÇK-së, Xhavit Jashari.
Ndërkohë Fadil Shurdhaj nga shoqata e Invalidëve të Luftës u shpreh: “Do të na detyrojnë që ne t’i marrim protezat dhe t’iu qesim para Kuvendit të Kosovës dhe qeverisë. Le t’i shkelin, këta kështu paskan dashur të vdekur ose të strukur dhe me mbet tek shtëpia.
“Ju bëjë thirrje juve që keni qenë pjesë e luftës të bëhen bashkë në parlament si krah i luftës dhe të mbërrijmë qëllimin dhe vlerat ku na takon. Ne nuk po lypim asgjë më shumë se që na takon, një mirëqenie sociale më të mirë me pas veterani, invalidi dhe familjet e dëshmorëve”, deklaroi Emin Lati nga OVL-UÇK.
Edhe Bajram Qerkini nga shoqata “Zëri i Prindërve” reagoi duke thënë: “Asnjë gjë nuk është realizuar që ka premtuar. Po edhe baba jem të ishte dhe farefisi nëse për 2 vjet e gjysmë më gënjen kam me i thënë boll se nuk mundem më.”
Haradinaj ndër të tjera nënvizoi se do të mbrojë të drejtën e veteranëve, por jo duke shkatërruar shtetin e Kosovës. Deputetë të AAK-së kanë paralajmëruar disa iniciativa ligjore që do t’i ndërmarrin në Kuvend, përfshirë edhe plotësim-ndryshimin e Ligjit për veteranët e UÇK-së.
